【姊妹】

昨暝阮夢見了姊姊
猶原彼年的模樣
編兩支長長的頭鬃尾
綁兩隻紅色的蛺仔
綴著行路的腳步飛

昨暝阮夢見了姊姊
紅紅嘴唄偌蘋果
歡喜的笑容真迷人
阮一直叫姊姊
姊姊只是一直笑
想欲牽伊的手
亦親像隔著透明的玻璃摸未著

五十年來佇阮的心內
姊姊永遠十四歲的模樣
媽媽因為失去姊姊傷心的形影
亦永遠印佇阮心內深深的所在
更加使阮心碎的是閣過三年了後
媽媽也因為破病離開阮去佮姊姊作伴
留阮孤單行佇人生這條路

一路行來當阮失意痛苦的時陣
也曾經怨嘆過天公伯對阮的無公平
但是阮也無未記持爸爸所講的話
只有接受命運才有勇氣接受生命所有的挑戰
希望未來的彼一工
爸爸媽媽佮姊姊攏會雙手拍啵呵咾阮的勇敢
雖然一路趴倒血流血滴
但是阮攏有一邊撫著痛疼的傷痕
一邊勇敢行佇屬於阮家己的路

阮真歡喜昨暝永遠十四歲的姊姊
來看阮這个將近六十歲的妹妹
圖檔