週一 8月 22, 2011 8:15 am
2011-08-16／5656
以前阮定定夢見您，夢中丌您就親像阮頭一擺看著您丌模樣，一點點阿白頭鬃
穿著熨到真平坦丌白衫佮西裝褲，看起來真嚴肅丌模樣。彼工阮穿一件牛仔褲，聽
講您真反對查某囝穿牛仔褲，但是彼工您看起來並無無歡喜。
阮入門了後阮慢慢知您精通英日文，也知在困苦的環境中長大丌您，家己學外
語是真無簡單丌載誌，後來還以這兩項外語佮高雄港口水流丌專業知識，得著拆船
引水丌頭路而成家立業，提起高雄拆船業丌歷史您是一個重要丌角色。
您的後生提起伊丌老爸丌時，定定講如果您當年有收受紅包，現此時亦是高雄
好額郎；您丌不貪凡事求好，是您丌後生至今奉為一生做人做事丌標準。
以您丌年代思想應該是真保守傳統，但是您真開化，一點點阿就無古板；阮只
生兩個查某子，您講查某子未輸後生毋免掛意。您疼媳婦比疼查某子更加疼，您講
吃老是欲靠媳婦毋是欲靠查某子；如今想起來阮參您丌緣分，比阮參阮阿爸丌緣份
更加深。
您去做仙了後丌前幾冬阮定定夢著您，有時有講話有時只是早前的影像重演，
最近這兩冬就無再夢過；朋友講您應該是去重出世所以才無再來看阮，阮亦同意朋
友丌講法。
如果有後世郎，如果阮還是出世做查某囡，如果有緣份，我真歡喜再做您的媳
婦，再叫您爸爸。
◎註解〈定定→常常，丌→的，台語音ㄟ。根據吳守禮教授考證台語文用字，有興趣
丌朋友請參考http://olddoc.tmu.edu.tw/Taiwanese-6/index.html〉
訂戶數：