清明，即過去無外久，個外月日爾，若有培墓風俗的人，應該會看著茨邊頭尾的陰宅。墓牌，大部分攏會寫著先祖兌叨位來，比論講：姓江的寫著「濟陽」，姓李的「隴西」，姓劉的「彭城堂」，姓郭的「汾陽」，足濟，足濟……百家姓內面全部攏有記載。

佇進前工，參網友罔講聊咧著堂號議題吓時陣，我凊采、烏白講講吓，阿將「河西」共「西河」當作共款的堂號咧講，橫直道是干礁以為左併讀爾爾。

尾矣，想想咧，好象嘸著，無對仝的款。一吓掀冊看了後，唉唷，即知影家己大錯特錯。「河西堂」是姓靳的堂號，阿若「西河堂」才是林姓佇台灣發跡的標誌，講來，源遠流長，可能說袂盡，遮，是完全無相仝的，是來自無仝所在的姓氏堂號。一時失察，錯將馮京當作馬涼，遂以為張飛咧戰岳飛。想到者，逶頷仔頸到面，洶洶，遂感覺一直燒起來。