週一 7月 31, 2006 9:26 am
麻來兜鬧熱, 講「田嬰」
不時共花翕相翕甲誠媠兮聯合網路城邦o.m老師，這兩工發表：「我家的小小模特兒蟲蟲」，內面是佇講「蜻蜓」，著是咱台語講e「田嬰」。
予我想起著較早，阮做囝仔e時代，行佇庄跤路呢，抑是佇溝仔邊、溪底石頭仔頂懸、或者是葉仔、樹枝、圍牆仔...等等，凊采著會使看著怹停落來歇睏e影跡，毋像即馬，卜看著田嬰e機會欲來欲僫(唸:oh4,音:噢 ,"困難"之意)，佇都市大漢e 囝仔，想著麻可憐，反勢田嬰生作按怎著毋知影。
阮彼咧時代，雖罔物質有較欠缺，毋擱滿四界充滿生機，逐工攏像佇現代儂專工設計e生態園區內面佚陶仝款，囝仔時陣有按呢e環境，致使從來著袂去烏白想遐有e冇e代誌，日子攏過了誠滿足誠快樂，思當時，猶原感覺幸福毋得比．．．
毋擱囝仔著是囝仔，有時陣麻誠"孽"(唸: gia t, 調皮搗蛋之意)，會記智逐年即咧時袸，田嬰誠濟，攏歸陣歸陣佇遐飛來飛去，阮遮猴囝仔著會用長長e竹篙，尾溜黏寡鹼粽（kinn3 音梔)，寬寬行到田嬰e尻倉尾，竹篙尾溜e鹼粽慢慢仔向準田嬰，這咧時袸毋通趕緊，"呷緊弄破碗" 這句話，阮誠細漢著位遮體會著矣，按呢著會使誠簡單共田嬰黏起來，係講雖罔愛耍，阮細漢麻知影毋通去傷到伊e 性命，攏掠來看看咧著放伊飛，好加在鹼粽袂共伊黏稠稠，造成危害，毋哪照即馬e講法，阮彼當袸著是置虐待動物兼破壞生態啦 ！
「註解」
共：跟。
翕相 ：照相。
誠媠 ：很美。
遮：這裡。
行佇庄跤路呢：走在鄉下路上。凊采：隨便。
歇睏：休息。
反勢：或許。
滿四界：到處是。
雖罔：雖然。
猶原：仍然。
怹：他們。
