週六 4月 22, 2006 12:36 pm
草嶺佇雲內
雲霧罩雲林－草嶺行 1.半路
欲去草嶺有兩條路，一條唯樟湖，一條唯竹山桶頭，頭一條頭況無好少人行，後一條出入較方便。
毋過平平雲林人欲去雲林的土地，煞愛踅過別縣的大路嘛怪怪，縣內客運嘛無車到草嶺，顛倒竹山
員林客運每工有三班車發草嶺，實在傷離譜！
頂禮拜日，我參志工去草嶺聯誼活動，預定好的行程，烏陰天亦著行，車定好勢，共持明寺的師
父嘛講好欲去食畫，改來改去一定閣有人都會未好勢（情況、時間等不方便）！
心內換好的想，無做風颱已經真佳哉仔，凡勢雨中的景色閣較嫷。想起我細漢，上合（音甲）意落
雨天，覆佇窗仔邊，恬恬看著天空頂雲霧的變化，看雨水咧落，看簾簷水咧滴，一看三點鐘嘛未嬗
（音善，疲憊）。
拜五落大雨、拜六早起嘛是閣落雨，下晡才歇雨，半暝閣落了幾仔陣雨，禮拜透早想講已經無雨，
集合的時煞閣落雨毛仔，啊！富戶人。
沿路歹天，有的路段雲霧真重
，白茫茫的雲霧罩椆咧，頭前的車來嘛看無。兇兇有車閃身，坐前座的人攏會掣一趒，一個志工後
壁面的人攏咧唱歌，伊坐頭一位，跤骨一直咧踏擋仔，踏甲跤骨強欲痠死。心內想：阮請的22人座
遊覽車是專門載登山隊走百嶽的，車身、司機攏真可靠，無咧，這聲慘嘍。
閃車的時陣，有一擺足恐怖，那像欲相碰著，伊驚一下唯座位險險仔跳落來，逐家是笑甲嘩嘩叫。
牽手順紲講一個笑話，伊講一改坐客運欲轉去二重溪，半路有庄跤人騎機車雄雄闖出來大路，伊大
聲哀一聲足大聲，規車的人客攏予伊驚一下心臟強欲恬去，司機才勻勻講：「我駛車的就無予騎機
車的驚著，煞予汝這個坐車的驚著！」規車的人煞笑甲車殼都欲舉起來！
半路，有幾落台遊覽車下山，心內歡喜，草嶺的景氣有較轉變嘍，草嶺的景色比華山嫷真濟倍，建
設、宣傳攏無夠，親像人的新婦仔（童養媳），無得人疼！
