小鬼仔毋捌見過大豬頭
發表於 : 週六 3月 18, 2006 12:21 am
小鬼仔毋捌見過大豬頭
昨咱執政黨的立委，竟然佇立法院為伊各人的代誌，參仝黨的立委五個人一個接一個，上台砲轟財政部長、關稅總局長，上離譜是連上基層海關關員嘛叫來罵，彼種罵人架勢、彼種罵人口氣、彼種罵人喙目鼻，予人印象深刻。
彼個小官員夆罵甲跤手肉疲疲掣，古意人毋捌拄著惡神，驚甲強欲疶青屎，只好窋一句：「願主耶穌賜你們平安」，真是阿彌陀佛！今仔日恨未台灣家己相刣，世界大亂，專門弄狗相咬的偉大新聞媒體就供體講：「大立委欺負小公務員」、「食人夠夠」。
我參一寡台灣人的智識份子共款，看未慣習干礁會當心肝凝爾，未當誶撊譙，所以絕對毋敢批評大立委「大奶矺死囝」的不是，毋過，對彼位「小關員」一定愛表示慰問嘉勉之意，佇這久的社會，閣有即款盡職無彎曲的公務員，嘛是咱綠色執政的偉大「成績」，閣揣嘛真少啊！
是講，小鬼仔毋捌（不曾）見過大豬頭，愛怪小官員見識傷淺薄，閣一條腸仔透尻川，目睭皮無漿泔，戇甲未扒癢，毋捌立委大爺，毋知立委大爺的「天威顯赫」，青瞑毋驚銃，頭毛試火，才會惹禍上身，奉勸伊念耶穌基督之外，愛喙齒拍折含血吞，以後甭閣傷相信「做官著清，做事著明」，凡事毋通鴨卵磕石頭。
閣再看了一齣立法院的漚戲拖棚，我欲共導演、編劇、演員講：「隱痀朝天－誠歹看」啦！
昨咱執政黨的立委，竟然佇立法院為伊各人的代誌，參仝黨的立委五個人一個接一個，上台砲轟財政部長、關稅總局長，上離譜是連上基層海關關員嘛叫來罵，彼種罵人架勢、彼種罵人口氣、彼種罵人喙目鼻，予人印象深刻。
彼個小官員夆罵甲跤手肉疲疲掣，古意人毋捌拄著惡神，驚甲強欲疶青屎，只好窋一句：「願主耶穌賜你們平安」，真是阿彌陀佛！今仔日恨未台灣家己相刣，世界大亂，專門弄狗相咬的偉大新聞媒體就供體講：「大立委欺負小公務員」、「食人夠夠」。
我參一寡台灣人的智識份子共款，看未慣習干礁會當心肝凝爾，未當誶撊譙，所以絕對毋敢批評大立委「大奶矺死囝」的不是，毋過，對彼位「小關員」一定愛表示慰問嘉勉之意，佇這久的社會，閣有即款盡職無彎曲的公務員，嘛是咱綠色執政的偉大「成績」，閣揣嘛真少啊！
是講，小鬼仔毋捌（不曾）見過大豬頭，愛怪小官員見識傷淺薄，閣一條腸仔透尻川，目睭皮無漿泔，戇甲未扒癢，毋捌立委大爺，毋知立委大爺的「天威顯赫」，青瞑毋驚銃，頭毛試火，才會惹禍上身，奉勸伊念耶穌基督之外，愛喙齒拍折含血吞，以後甭閣傷相信「做官著清，做事著明」，凡事毋通鴨卵磕石頭。
閣再看了一齣立法院的漚戲拖棚，我欲共導演、編劇、演員講：「隱痀朝天－誠歹看」啦！