週二 5月 30, 2006 11:30 pm
一任清風送白雲－盡力隨緣
好朋友如玉食老才咧出癖仔（痲疹），最近幾個月要緊咧讀冊拚公職考試，一寡興趣、休閒的活動攏暫時停起來。若是想欲拋出去的念頭浮起來，驚收未轉來，伊歸氣共念頭捏予死，專心一意的精神真正了不起。
四十外外歲人，毋但愛上班，閣著款厝內，時間實在無夠用，所看的冊閣是毋捌讀過的法律冊，真粗澀、真僫（難）看，真濟閣愛記予椆。考試的時間愈來愈接近，壓力愈來愈大，我勸伊免緊張，發覺是我家己咧緊張。勸伊免緊張，毋但未幫贊伊，閣加添伊的壓力。我外人就咧緊張啊，相信伊私底下嘛足緊張。
我會緊張特別關心毋是無原因，是我鼓舞伊去準備考試，伊煞誠正經認真咧準備，予我著一驚，心內對伊的勇氣佮意志非常的佩服，使予我對伊加一層的認捌。讀冊的苦楚伊毋捌提起，我是愈想愈歹勢。我嘛是考過試的人，知影為著考試來讀冊，是足辛苦，專業的冊實在歹讀，莫怪人講：「冊，愈看愈慼」，一潦落欲放棄毋甘願，欲讀落去誠困難，頭殼時常抈咧燒，叫天天未應，叫地地未靈。啊！彼個罪魁禍首就是我啦！
毋過，有志氣就有機會，萬一伊若真正金榜有名，我就是「恩公」啊！有工就有夫，搰力做，才趁會著好運。欲得著一寡收成，嘛著勤種作，無彼個無落種望收成的道理。扑拚這項，一定就會犧牲一寡別項，辛苦是一個過程，等到收成就會特別歡喜，享受著收成的甘甜，其實上感心的是過程當中的彼份堅持，如果有這份認真的堅持，盡力而為，就準講是種種因素無得著成功，就是天命，按呢就免怨歎、自責、失望、艱苦，只有心平氣和、心甘情願去共接受，按呢叫做隨緣。隨緣，未因為失敗的打擊勼退（退縮）、餒志（喪志），將這層代記椆椆，心未開。
隨緣，就是順其自然；盡力，是盡家己上大的力量扑拚。如果隨緣無參盡力做伙講，就真容易夆做抽退、貧惰、依阿從事（敷衍塞責）的藉口。隨緣，並毋是聽其自然，據在伊自生自滅，而是事前就把握機會，盡力量盡本份搰力去做，若對得起良心，結果是好是歹就免傷致意，成功當然歡喜，失敗嘛未憂愁。用平常心來看待，這，才是「盡力，一切隨緣」，一切隨緣就是隨緣不變，隨順因緣的變化，心境未綴（跟隨）著成功、失敗、得著、失去、興旺、衰微、呵咾、恥笑種種的境界起起落落，悲憂苦腦。
啊！就親像百丈懷海禪師講的「有緣即住無緣去，一任清風送白雲」，按呢毋知欲偌好咧。
