週日 5月 14, 2006 10:44 pm
細漢佇夢中紡見
細漢是迢遠的代誌，對無頭神的我，大多數是空囉嗦，干礁（只）賰（剩）會記一項：逐工早起時，阿母愛用行的，去兩口灶（兩戶）共人洗衫。有時拄到衫濟（多），洗了較晏（晚）愛閣趕另外彼位，我囡仔人行路慢，阿母歸氣（乾脆）共我揹咧行足緊，日頭炎，我的汗滴落阿母澹澹的尻背脊尻頂，並無彼種日頭芳的味。
第一口灶我已經未記得主人是誰，另外一口灶是德春印板所（印刷廠），頭家頭家娘人真好，誠疼我，攏會提好食物仔請我，逐擺我攏毋敢提，一定愛阿母講好才肯說謝接收。後來我出社會去公家食頭路，到了升做正式職員，捌想欲去揣印板所的頭家頭家娘答謝，可惜印板所已經無開，人嘛無知蹛（住）佗位？
小學的代誌會記得的嘛真少，二姊嫁去埒內的織布廠，拜六下晡或者禮拜無讀冊，定定會去織布廠姊夫的宿舍佚陶（遊玩）。二姊足爻（gau5能幹）煮食，宿舍前前後後種真濟大欉果仔樹，像龍眼、荔支、檨仔（芒果）。上趣味的是廠房邊仔有足濟窟水池仔，水池仔有足濟魚仔，會去遐捊（撈）魚仔、釣魚仔，毋過尾仔才知奚（那是）是死窟仔水，魚仔的肉歹食，所以無人去掠（捉）。
予二姊請飽，有食閣有掠，閣有大包細包聽好（可以）提轉來厝予阿母。姊夫有一台翕相機，攏會幫我翕相，我閣有一張上早的相片，是佇織布廠對面的中正國小石橋頂翕的。上可惜的，姊夫攏無翕著阿母的寫真（照相的日文），留囥的相片當中，干礁大兄結婚的時，佮我結婚的時，阿爸阿母做伙翕的相片。
二姊夫後來搬去桃園，織布廠嘛早就拆了了，只賰一欉足大欉的老樹。時間過著真緊，十五歲以前的生活光景一目間已經過四十年，細漢佇夢中嘛揣無啥影跡！
